Sons de Nós 31 de maio de 2024 con Faia Díaz

SONS DE NÓS RadioFusión

Faia é cantante de profesión e, atrevémonos a asegurar que de vocación, e licenciada en Historia da Arte de formación. Seguramente a súa faceta máis coñecida é a que desenvolve como fundadora e integrante do grupo musical De Vacas dende 2015, pero tamén do Coro Encaixe que temos coñecido no concurso televisivo “o happy day”, do que foron gañadores; participa tamén na compañía A Patacón desde 2017 e é impulsora de Nacho Faia Lar, un novo proxecto musical que leva a Zeca Afonso por bandeira. Por se isto fose pouco comparte escenario con Guadi Galego na súa última proposta “Síntese Horizonte” e está a preparar o que será o seu segundo traballo discográfico. Faia Díaz leva a música no ADN porque na casa sempre estivo presente, os teus pais, Tereixa Novo e Ramón Díaz formaban parte de Fuxan os Ventos dende a súa creación e a súa influencia musical e vital de compromiso sempre está presente. Unha tradición musical familiar que lonxe de resultar unha responsabilidade á hora de iniciar a súa carreira musical resultou un pulo importante que reforzou a súa intención de subir a un escenario. Con De Vacas, o cuarteto musical que comparte coa Marela que é Inés Salvado, Paula Romero, que é a Morena, Faia Díaz a Pinta do grupo e a Rubia que non podía faltar que é o guitarrista Guillerme Fernández. Con De Vacas tómanse a risa moi en serio, o grupo fai versións en galego de temas comerciais, mudando a letra e dándolles un formato retranqueiro e divertido adobiado de calidade musical indiscutible. En solitario tennos ofrecido un proxecto de recuperación e reinterpretación de pezas tradicionais, “Ao Cabo Leirín”, no que reivindica o traballo de conservación e recuperación da música tradicional que teñen feito mulleres anónimas ao longo dos anos. Un traballo no que ten experimentado cos lugares de gravación e co xeito de gravación “en cru”, sen artificios. Tradición, reinterpretación e experimentación con respecto. Nacho Faia Lar é outro dos proxectos cos que está a traballar. Nacho Muñoz, ao teclado e electrónica, Lar Legido, do grupo palentino Sumrrá, na batería e Faia poñendo a voz a un repertorio baseado na música de Zeca Afonso. Faia está, neste momento, compartindo escenarios con Guadi Galego, formando parte do equipo de artistas que a acompañan no espectáculo “Síntese Horizonte” que Guadi está a presentar por Galicia. Gozade desta conversar con Faia Díaz Novo outra das mulleres que, sen lugar a dúbidas, están e seguirán a dar moitas alegrías á música galega. Unha voz fabulosa, cálida e comprometida. Asentada na tradición máis fonda pero tamén coa vangarda como proposta.